• Навіны

У беларускіх школах увядуць адзіны дзень прафарыентацыі

 

Скрыншот відэа тэлеканала СТВ

 У беларускіх школах увядуць адзіны дзень прафарыентацыі, заявіў міністр адукацыі Беларусі Андрэй Іванец у інтэрв'ю тэлеканалу СТВ.

"У гэтым годзе мы ўводзім ва ўсіх установах агульнай сярэдняй адукацыі адзіны дзень прафарыентацыі. Гэта апошняя субота кожнага месяца. Прадугледжваецца не проста правядзенне лекцый, апавяданняў, заняткаў, прыходу адпаведных прадстаўнікоў не толькі каледжа, універсітэтаў, але і прадпрыемстваў рэальнага сектара эканомікі ў школу, выхад нашых хлопчыкаў і дзяўчынак, школьнікаў на прадпрыемствы. Бо вельмі важна, каб сёння маладыя людзі, якія вучацца ў школе, змаглі на свае вочы ўбачыць тое будучае месца працы, на якое яны могуць прыйсці ў выпадку, калі выберуць менавіта спецыяльнасці інжынерна-тэхнічнага профілю", - адзначыў Андрэй Іванец.

Міністр расказаў, што ў гэтым годзе ўпершыню будуць выпускацца інжынерныя класы. Такія выпускнікі маюць прэферэнцыі пры паступленні ва ўніверсітэты.

Таксама Андрэй Іванец звярнуў увагу, што Міністэрствам адукацыі ў Год якасці на кожным узроўні адукацыі рэалізуецца адпаведная праграма, каб выйсці на якасна новы ўзровень. У прыватнасці, практычна поўнасцю перапрацаваны праграмы ў частцы дашкольнай адукацыі.

"У прыярытэце стаіць, вядома, падрыхтоўка нашых самых маленькіх выхаванцаў да прыходу ў школу, да выхавання паважлівых адносін да нашай краіны", - расказаў міністр.

На ўзроўні агульнай сярэдняй адукацыі ўсе дзесяцікласнікі пачалі вывучаць новы навучальны прадмет, якога раней не было, - "Гісторыя Беларусі ў кантэксце сусветнай гісторыі". Гэта інтэграваная дысцыпліна, якая заклікана не проста даць гістарычныя веды, а сфарміраваць светапогляд, гонар за гісторыю краіны.

"Мы вялікую ўвагу ўдзяляем рабоце з нашымі адоранымі навучэнцамі. У гэтым годзе 56 медалёў з міжнародных прадметных алімпіяд прывезлі нашы школьнікі па цэлым блоку прыродазнаўчых дысцыплін. Мы паказалі самыя высокія вынікі за ўсю гісторыю суверэннай Беларусі", - адзначыў міністр.