Рэспубліканскі заказнік "Морачна" размешчаны на тэрыторыі Столінскага раёна Брэсцкай вобласці. Утвораны ў 2015 г. на плошчы 6444 га. Мае статус тэрыторыі міжнароднага значэння важнай для птушак, а таксама водна-балотнага ўгоддзя міжнароднага значэння (Рамсарскай тэрыторыі).
Ландшафт
Заказнік уяўляе сабой складаную водна-балотную сістэму з перавагай рэдкіх для Беларускага Палесся градава-мачажынных сфагнавых балот верхавога тыпу. Ядро водна-балотнага ўгоддзя - тыповае верхавое балота на водападзеле рэк Гарынь, Стыр і канала Дубойскага. Балота Марачна - трансгранічны балотны масіў на мяжы Украіны і Беларусі, адно з трох найбуйнейшых верхавых балот, якія захаваліся ў натуральным стане на Палессі пасля маштабнай асушальнай меліярацыі. Гэта самае старажытнае балота Беларусі - яго фарміраванне пачалося каля 10 тыс. гадоў таму.
У балота Марачна не ўпадае ні адна рака, і воднае забеспячэнне ажыццяўляецца толькі за кошт атмасферных ападкаў і падземных вод. Гідраграфічная сетка заказніка прадстаўлена меліярацыйнымі каналамі і невялікімі прытокамі Гарыні.
Меліярацыйныя каналы на тэрыторыі заказніка з'явіліся ў пачатку 20 ст. У гэты час праз усе балота з поўначы на поўдзень і з захаду на ўсход былі пракапаны два магістральныя каналы: Магільны (даўжынёй каля 6,3 км, цяпер практычна не функцыянуе) і Дубойскі (4 км). Канал Магільны на тэрыторыі Украіны ўпадае ў р. Сырэц (левы прыток Гарыні). Меліярацыйныя каналы ў асобных месцах перакрыты бабровымі плацінамі.
Дзякуючы перавазе адмоўных формаў рэльефу на тэрыторыі заказніка значны пляц (60%) займаюць раслінныя супольнасці балотных іглічных і лісцяных лясоў. Сярод іх абсалютна пераважаюць хваёвыя лясы (90% усіх лясоў), у тым ліку балотныя хвойнікі. Нязначная доля лясоў належыць вытворным бярэзнікам. Фрагментарна на тэрыторыі заказніка сустракаюцца дубровы, грабавыя, пушыстабярозавыя і чорнаальховыя лясы. Ва ўсходняй і цэнтральнай частцы балота знаходзіцца шэраг буйных, парослых лесам, мінеральных астравоў. Па краях балота размяшчаецца некалькі масіваў унікальных старых ельнікаў. Іх каштоўнасць у тым, што яны знаходзяцца за межамі паўднёвай мяжы суцэльнага распаўсюджвання елкі.
Флора
У складзе флоры заказніка зарэгістравана 584 віды судзінкавых раслін.
Тэрыторыя заказніка ўнікальная з пункту гледжання канцэнтрацыі фітацэнатычнай і ландшафтнай разнастайнасці: тут выдзелена 30 лясных і 16 балотных экасістэм, што з'яўляецца надзвычай высокім паказчыкам для рэгіёну. Балота Марочна - адзін з найбуйнейшых у краіне журавіннікаў.
Фауна
На тэрыторыі заказніка "Морачна" ўстаноўлена пражыванне 159 відаў наземных пазваночных жывёл, сярод якіх 29 відаў млекакормячых, 113 - птушак, 7 - паўзуноў, 10 - земнаводных. На ўчастках балота насяляюць шэры журавель, фіфі, бакас, усе тры віды месяцоў (палявы, лугавы і балотны), жоўтагаловая пліска, лугавы чакан. У складзе лясной арнітафауны прадстаўлены амаль усе віды дзятлаў, два віды лясных галубоў - клінтух і вяхір, таксама івалга, рабчык. Фонавымі для лясной арнітафауны з'яўляюцца звычайныя шырока распаўсюджаныя віды вераб'іных птушак: зяблік, валасянка-пярэстушка, чорны і пеўчы дразды, паўзень, чарнагаловая слаўка, заранка інш. Колькасць капытных жывёл на тэрыторыі заказніка невысокая. З драпежнікаў у лясах насяляюць лясная куніца і ласка. На мінеральных "градах" сярод балота і ўскраінных дзюнах выяўлены норы лісы. Перыядычна тэрыторыю заказніка наведвае воўк. З паляўнічых відаў звяроў звычайныя вавёрка і заяц-русак.
Унікальныя аб'екты
У наваколлях заказніка ў в.Гарадная да гэтага часу на паверхні зямлі захавалася парослае лесам гарадзішча як астатак старажытнага ўмацаванага паселішча. Больш за тое, у раёне гараднянскай Замкавай гары ёсць і гарадзішча як месца старажытнарускага паселішча гарадзенцаў. Вёска Гарадная - адзін з прызнаных цэнтраў ганчарнага промыслу на Палессі.
Схема
