Знакавай датай адзначаны 2024 год - 80-й гадавінай вызвалення Рэспублікі Беларусь ад нямецка-фашысцкіх захопнікаў, 2025 год - 80-й гадавінай Перамогі савецкага народа ў Вялікай Айчыннай вайне.
У сувязі з гэтым 5 кастрычніка 2023 года Прэзідэнт Беларусі Аляксандр Рыгоравіч Лукашэнка падпісаў Указ № 316 "Аб падрыхтоўцы і правядзенні святочных мерапрыемстваў".
Гэты дакумент прыняты ў мэтах каардынацыі дзейнасці дзяржаўных органаў і арганізацый, грамадскіх аб'яднанняў па падрыхтоўцы і правядзенні на высокім арганізацыйным узроўні святкавання 80-й гадавіны вызвалення Рэспублікі Беларусь ад нямецка-фашысцкіх захопнікаў і Перамогі савецкага народа ў Вялікай Айчыннай вайне.
Трагічныя факты аб гісторыі Вялікай Айчыннай вайны сталі ўрокам мужнасці і патрыятызму для брацкіх народаў Беларусі і Расіі. Доўгіх 1418 дзён і начэй народы СССР ішлі да перамогі. Беларускія землі вызвалілі ад прыгнёту гітлераўскай акупацыі 80 гадоў таму – у 1944 г.
Тры гады знемагала пад фашысцкім ярмом беларуская зямля. Фашысты, абраўшы палітыку генацыду і масавага крывавага тэрору, чынілі тут нечуваныя зверствы, не шкадуючы ні жанчын, ні дзяцей. Канцлагеры і гета дзейнічалі практычна ў кожным раёне Беларусі: усяго ў межах рэспублікі было створана 260 лагераў смерці і 70 гета. Толькі ў адным з іх - у Трасцянцы пад Мінскам - знішчана больш за 200 тысяч чалавек
Акупантамі і іх памагатымі падчас вайны было разбурана і спалена 9200 населеных пунктаў. Звыш 5295 з іх былі знішчаны разам з усімі жыхарамі або з часткай насельніцтва. 186 вёсак так і не змаглі адрадзіцца, бо былі знішчаны з усімі вяскоўцамі, у тым ліку маці і грудных дзяцей, нямоглых старых і інвалідаў. Ахвярамі нацысцкай палітыкі генацыду і тактыкі "выпаленай зямлі" сталі 2 230 000 чалавек, загінуў фактычна кожны трэці жыхар Беларусі.
Аднак беларусы не змірыліся з "новым парадкам", які насаджалі на акупаваных тэрыторыях гітлераўцы. З першых дзён вайны ў гарадах і пасёлках ствараліся падпольныя групы, а ў лясах - партызанскія атрады. Партызанскі рух на тэрыторыі Беларусі меў агульнанародны размах.
Да канца 1941 года ў шэрагах партызан у 230 атрадах змагаліся 12 000 чалавек, а да лета 1944 года колькасць народных мсціўцаў перавышала 374 тысячы чалавек, якія былі аб'яднаны ў 1255 атрадаў, 997 з якіх уваходзілі ў склад 213 брыгад.
Беларусь заслужана называлі "рэспублікай-партызанкай": за тры гады гераічнай барацьбы ў тыле ворага беларускія патрыёты знішчылі амаль паўмільёна гітлераўцаў і паліцэйскіх.
Вызваленне Беларусі пачалося ў 1943 годзе, калі ў жніўні - верасні ў выніку правядзення Смаленскай, Бранскай, Чарнігаўска-Прыпяцкай, Лепельскай, Гомельска-Рэчыцкай аперацый былі вызвалены першыя беларускія гарады. Адной з найбуйнейшых бітваў на завяршальным этапе Вялікай Айчыннай вайны стала Беларуская аперацыя, якая ўвайшла ў гісторыю пад назвай "Баграціён".
Вымпелам "За мужнасць і стойкасць у гады Вялікай Айчыннай вайны" ўзнагароджаны 9 населеных пунктаў Беларусі. Адпаведны Указ № 44 падпісаў 2 лютага 2024 года Кіраўнік дзяржавы Аляксандр Рыгоравіч Лукашэнка.
Населеныя пункты, узнагароджаныя вымпелам, з'яўляюцца дастойным прыкладам баявога і працоўнага подзвігу, усенароднага супраціўлення, праяўленых у гады Вялікай Айчыннай вайны. Узнагароджаны гарады Баранавічы, Дзяржынск, Дзятлава, Калінкавічы, Любань, Асіповічы, Чавусы, гарадскія пасёлкі Обаль і Асвея. Яны ўдастоены ўзнагароды ў сувязі са святкаваннем 80-й гадавіны вызвалення Беларусі ад нямецка-фашысцкіх захопнікаў і Перамогі савецкага народа ў Вялікай Айчыннай вайне, а таксама ў мэтах увекавечання подзвігу воінаў Чырвонай арміі, рабочых, партызан і падпольшчыкаў. гарадоў і іншых населеных пунктаў. Да гэтага часу ў Беларусі былі ўзнагароджаны вымпеламі "За мужнасць і стойкасць у гады Вялікай Айчыннай вайны" 27 населеных пунктаў. Гэты знак адрознення быў заснаваны 6 кастрычніка 2004 года ўказам Прэзідэнта да 60-годдзя вызвалення рэспублікі ад нямецка-фашысцкіх захопнікаў. Кожнае з гэтых 27 месцаў стала сапраўднай цытадэллю мужнасці, у якой неверагодную адвагу праявілі не толькі байцы, але і мясцовыя жыхары.
