Гродна рыхтуецца да маштабнага фестывалю нацыянальных культур. Яго называюць сімвалам міру і міжнацыянальнага сяброўства на беларускай зямлі - яднання нацый і народнасцей, іх духоўнага багацця і творчага патэнцыялу.
Гэта ХIV Рэспубліканскі фестываль. Ён стартуе ў гэтую пятніцу і будзе праходзіць тры дні. Два дні - у Гродне, а трэці дзень - нядзеля - прыме Аўгустоўскі канал. Дарэчы, ён адзначае сёлета сваё 200-годдзе. На свяце чакаюць больш за 850 удзельнікаў.
Вызначаны месцы для размяшчэння 19 падворкаў. У Гродна прыедуць прадстаўнікі 36 нацыянальнасцей. Удзельнікі пакажуць свае традыцыі, культуру, касцюмы, кухню і рамеснае майстэрства.
Упершыню прадставяць сябе выхадцы з Аргенціны, Бураціі, Манголіі, Егіпта, Камеруна, Нігерыі і Пакістана. Праграма абяцае быць вельмі насычанай.
Яркія падворкі нацыянальных дыяспар, якія пражываюць у Беларусі, канцэртныя праграмы, выставы і пленэры. Гродна рыхтуецца сустракаць ХIV Рэспубліканскі фестываль нацыянальных культур. Анонс святочнай афішы - у матэрыяле "Панарамы".
Пад урачыстасці адвялі ўвесь гістарычны цэнтр Гродна. Гасцей свята чакаюць шматлікія канцэрты аматарскіх і прафесійных калектываў, творчых аб'яднанняў беларусаў замежжа і замежных студэнтаў. На працягу трох дзён можна будзе не толькі пазнаёміцца з культурай і традыцыямі дыяспар, пакаштаваць нацыянальныя кухні розных народаў свету, але і прыняць удзел у шматлікіх пленэрах, круглых сталах і выставах. Самай яркай падзеяй першага дня фестывалю стане традыцыйнае тэатралізаванае шэсце. Яго параўноўваюць з бразільскім карнавалам.
Запланавана маштабнае шэсце прадстаўнікоў нацыянальных культур, якое пройдзе з вуліцы Дзяржынскага на плошчу Савецкую. Тут а 21:00 пачнецца цырымонія адкрыцця фестывалю, і пасля гэтага пройдзе гала-канцэрт. Гала-канцэрт і работа ўсіх тэматычных пляцовак сёлета будзе прысвечана тэматыцы сям'і.
Увагу гараджан і гасцей фестывалю прыцягне работа перасовачнага комплексу музея гісторыі Вялікай Айчыннай вайны "Дарога памяці", выстава кірмаш "Горад майстроў". А ў Каложскім парку Алея дружбы папоўніцца новымі дрэвамі, якія высадзяць аргентынцы, манголы, нігерыйцы і прадстаўнікі іншых нацыянальнасцей, якія ўпершыню ўдзельнічаюць у фестывалі.
