13 снежня, Мінск /Кар. БЕЛТА/. Першы навагодні поезд адправіцца сёння з Мінска да Дзеда Мароза ў Белавежскую пушчу, паведамілі БЕЛТА ў прэс-цэнтры БЧ.
Праект традыцыйна рэалізуецца ў перыяд калядных і навагодніх свят. Поезд складаецца з купэйных вагонаў. У падарожжа са сталіцы ён стартуе 13, 20, 24 снежня, 6 і 10 студзеня ў 22.45 і прыбывае ў Брэст на наступны дзень у 7.50.
"З вакзала станцыі Брэст-Цэнтральны ў пушчу турыстаў даставяць на камфартабельных аўтобусах. Падарожнікаў чакае насычаная навагодняя экскурсійная праграма. Яны наведаюць Маёнтак беларускага Дзеда Мароза, дзе іх чакаюць упрыгожаныя ажурнай разьбой домікі, скульптуры казачных персанажаў, прыбраная навагодняя ёлка. Турысты таксама ўбачаць Церам Снягурачкі, Чароўны Млын, пабываюць на алеі знакаў Усходняга Календара, змогуць загадаць свае самыя запаветныя жаданні на паляне Дванаццаці Месяцаў", - расказалі ў прэс-цэнтры.
Праграмай тура таксама прадугледжана частаванне ўсіх гасцей Маёнтка пышнымі блінамі і гарачым чаем на пушчанскіх травах у кафэ "Хата Дзеда Мароза", "фота-сафары" па Белавежскай пушчы з наведваннем зоавальернага комплексу і экскурсія ў Музей прыроды.
У сталіцу з Брэста навагодні поезд 14, 21 і 25 снежня, 7 і 11 студзеня будзе стартаваць у 17.56, прыбываць у Мінск: 14 снежня - у 22.20, у астатнія дні - у 22.18. У дарозе пасажыраў чакае сустрэча з чыгуначным Дзедам Марозам і анімацыйная праграма.
"Асаблівасць падарожжа ў тым, што ўдзельнікі тура з паездкі вернуцца ў Мінск на тым жа поездзе і на тых жа месцах, на якіх адправіліся ў падарожжа", - расказалі ў БЧ.-0-
