Тэрмін абарачэння імянных прыватызацыйных чэкаў "Маёмасць" устаноўлены па 31 снежня 2030 г. Уладальнікі чэкаў "Маёмасць" маюць магчымасць скарыстацца прадастаўленым заканадаўствам аб прыватызацыі правам на ўдзел у бязвыплатнай прыватызацыі дзяржаўнай маёмасці. Адзіным спосабам выкарыстання чэкаў па мэтавым прызначэнні сёння з'яўляецца іх абмен на акцыі прадпрыемстваў, якія належаць дзяржаве. Абмен акцый на чэкі "Маёмасць" праводзіцца ў любым падраздзяленні ААТ "ААБ Беларусбанк", якое выконвае дадзеную аперацыю (на тэрыторыі Брэсцкай вобласці - гэта аддзяленне № 100/1029 у г. Брэсце, бульвар Касманаўтаў, д. 94, а таксама цэнтры банкаўскіх паслуг ва ўсіх раённых цэнтрах вобласці). Пры звароце ў банк пакупнік павінен прад'явіць пашпарт грамадзяніна Рэспублікі Беларусь і сертыфікат чэкаў "Маёмасць". Пры абмене грамадзяне маюць права выкарыстоўваць чэкі, выдадзеныя ім асабіста і атрыманыя ў спадчыну (без абмежавання колькасці), а таксама атрыманыя па дагаворах дарэння ад блізкіх сваякоў (у суме не больш за 250 чэкаў пры ўмове, што дорацца толькі чэкі, выдадзеныя гэтым асобам). Набываючы акцыі, грамадзянін становіцца акцыянерам адпаведнага акцыянернага таварыства і, згодна з заканадаўствам, надзяляецца правам на ўдзел у кіраванні таварыствам, атрыманне інфармацыі аб дзейнасці прадпрыемства, а таксама продаж, дарэнне і атрыманне ў спадчыну акцый. З іншай інфармацыяй аб парадку выкарыстання чэкаў "Маёмасць" можна азнаёміцца на сайце Брэсцкага аблвыканкама (сайт www.brest-region.gov.by, раздзел "Камітэт "Брэстаблмаёмасць" / "Даведачная інфармацыя" / "Абмен акцый на ІПЧ "Маёмасць").
