У філіяле "Выратаваныя мастацкія каштоўнасці" Брэсцкага абласнога краязнаўчага музея 12 лютага адбудзецца адкрыццё выставы "Свет Шагала". Аб гэтым паведамілі карэспандэнту БЕЛТА ва ўстанове культуры.
У праекце паўдзельнічалі юныя мастакі студый выяўленчага і дэкаратыўна-прыкладнога мастацтва Цэнтра дадатковай адукацыі дзяцей і моладзі Брэста. На выставе прадставяць жывапісныя, графічныя і керамічныя творы, на стварэнне якіх брастаўчан натхніла творчасць Марка Шагала.
"Праект уяўляе своеасаблівую мазаіку ўражанняў ад знаёмства з творчасцю выдатнага мастака XX стагоддзя, ураджэнца Беларусі Марка Шагала. Работы прысвечаны яго знакамітым карцінам, гісторыям аб яркіх хвілінах жыцця майстра. У большасці твораў дзеці прадставілі Марка Шагала ў Брэсце. У сваім вечным палёце мастак зноў і зноў вяртаецца на Радзіму, дорыць нам сваё натхненне, напаўняе штодзённы побыт горада любоўю і чараўніцтвам", - апісалі выставу музейшчыкі.
Убачыць "Свет Шагала" ў Брэсце можна будзе да 9 сакавіка.
У самім Брэсцкім абласным краязнаўчым музеі 10 лютага адкрыецца выстава "Кветкамі ўсміхаецца Зямля" з творчымі работамі ў розных тэхніках з музейных фондаў і прыватных калекцый. "З глыбокай старажытнасці кветкі з'яўляліся нязменнымі спадарожнікамі чалавека. Іх прыгажосць і водар прымушалі людзей пакланяцца ім. Але не круглы год яны радуюць нас. Хоць так хочацца бачыць каля сябе гэтыя цудоўныя стварэнні прыроды ў халодныя зімовыя дні", - канстатавалі ў Брэсцкім абласным краязнаўчым музеі.-0-
